: تعالو اقولكم يعني تخاطب ؟!
حابة الكلام يكون بسيط وسهل علشان الأمهات تفهموا بسهولة
التخاطب هو التواصل والتواصل مش بالكلام فقط أحنا بنتواصل بالكلام والإشارة والكتابة والايماءات .....الخ
💪امتي بقي تحسي أن ابنك عنده مشكلة ومحتاج للتخاطب أو زيارة اخصائي تخاطب أو مهارات ؟!
...... أما تحسي ابنك مبيتواصلش مع الآخرين مبيندمجش مع الاطفال مبيتفاعلش مع المجتمع حواليه بابا تيتة جدو خالو .... حاسة أنه مش فاهمكم واما بيكون مع اطفال ف نفس سنه تحسي أنه اصغر منهم لغويا وادراكيا ومعرفيا وقتها لازم تزورى اخصائي التخاطب واوعي تسمعي لكلام حد أو رأي حد أن الطفل أما يكبر هيتكلم اصبري عليه شوية اصل خالو كدة عمو كان كدة واتكلم كل دة كلام فارغ وبياخر الطفل كتير كتير التدخل المبكر مهم جدا للطفل
: 💪🏻ببساطة اكتر ودة اللي حابة يوصلك
. الطفل وهو عنده من سنة ل سنة ونصف يقدر يقول كلمة مفردة وتوصل حصيلة الكلمات معاه الي ٥٠ كلمة
الطفل وهو عنده سنتين بيكون جملة من كلمتين . تلات سنوات جملة من تلات كلمات ومش مهم خالص تكون الكلمات صحيحة والمخارج صحيحة ينطقها زى ما هو عايز ولكن تكون جملة من تلات كلمات
👌اول ما تلاقي ابنك مش كدة يبقي ابنك متاخر لغويا
💪💪قواعد مهمة جدا لتنمية اللغة عند الطفل
* التحدث مع الطفل مهم لتطوير اللغة لان الاطفال بيقلدو الكبار
* الحفاظ علي أن يكون في تواصل بصري والنظر مباشرا في وجه الطفل والانتظار أنه ينتبه ونبدا بقي نتكلم معاه
* لازم يكون في وقت من الوالدين للعب مع الطفل واكتشاف اشياء جديدة وتعليمه مفاهيم جديدة
* الشاشات الالكترونيه ممنوعة تحت اربع سنين
* نشجع الطفل علي التفاعل مع الأطفال الآخرين في النادى في تجمع عائلي
* استخدام صور ومجسمات وقصص لتعليم الطفل
* التصحيح الغير مباشر لكلام الطفل ومنفرضش عليه اكمال جملة مش قادر يكملها ف الحالة دى نشجعه كتير ونبدا نقول احنا الجملة قصاده وهو بالنمذجة هيقلدك
* متقاطعيهوش وهو بيتكلم شجعيه بالنظرات الجميلة ليه علشان يكون عنده ثقة ف نفسه
* دائما توصفي الأحداث اليومية اللي بتحصل قدامه
*دائما تعملي معاه حوار ولكن عن طريق اللعب وتبادل الأدوار
* تنبيه الطفل للأصوات الموجودة في البيئة جرس الباب . جرس التليفون .اصوات الحيوانات وتمييز الاصوات دى عن طريق اللعب
اخصائيه تخاطب وتربية خاصة
باحث ماجستير تربية خاصة
مدرب معتمد جامعة عين شمس
شيماء بديع
